«أنا نظري سليم، بس بلبس نظارة حفظ نظر»
جملة شهيرة جدًا بتخلينا نتخيل إن فيه نظارة بتمنع ضعف النظر، حتى لو العين مش محتاجاها.
لكن هل ده حقيقي ولا خرافة؟
«نظارة حفظ النظر» مش اسم طبي لنوع من النظارات بيحافظ على مقاس النظر أو يمنع تغييره.
النظارة الطبية وظيفتها تصحيح عيوب الإبصار، زي قصر النظر وطول النظر والاستجماتيزم، وبتساعدنا نشوف بوضوح أثناء لبسها.
نظارة حفظ النظر
هل فيه نظارة بتعمل حاجز يمنع ضعف النظر في المستقبل لو نظري سليم في الوقت الحالي؟
لأ، مفيش.
طيب، أمال إيه نظارة حفظ النظر دي؟
أحيانًا الناس بتسمي النظارة ذات المقاس البسيط «نظارة حفظ نظر»، فيفتكر الشخص إنها مجرد احتياط، لكن حتى المقاس البسيط ممكن يكون له دور في تحسين الرؤية وراحة العين، حسب نتيجة الكشف واحتياج كل شخص، وبكده النظارة مش مجرد احتياط.
طيب، أمال إيه دور النظارة؟
أهمية النظارة بتتحدد حسب الكشف والأعراض وتأثيرها على الرؤية.
النظارة المناسبة وبالمقاس المظبوط ليها دور مهم جدًا في تحسين الرؤية أثناء لبسها.
وكمان عند الأطفال، الموضوع ليه أهمية خاصة؛ فالنظارة ممكن تساعد في تطور الرؤية، وتكون جزءًا مهمًا من علاج كسل العين، إن وُجد، وأوقات بتكون جزءًا مهمًا من علاج بعض أنواع الحول.
وده مختلف تمامًا عن فكرة إن أي شخص نظره سليم محتاج نظارة عشان تحفظ نظره. وعلشان كده، النظارة الموصوفة طبيًا مينفعش نوقفها من نفسنا، اعتقادًا مننا إنها هترجع نظرنا في فترة مؤقتة، وبعدين نقدر نستغنى عنها.
لما تتكتب لك نظارة، متكتفيش بعبارة «حفظ نظر» لو اتقالت لك. الأفضل نفهم: النظارة اتكتبت ليه؟ وهتساعدك في إيه؟ وإمتى لازم تلبسها؟ دي أسئلة أهم من اسمها المتداول.
النظارة وظيفتها تصحيح النظر أثناء لبسها، لكن اسم «حفظ النظر» مش ضمان إن مقاس نظرك مش هيتغير.
اقرأ أيضا: هل الجزر يقوي النظر؟
